AgriTech ինկուբացիոն ծրագրի նախորդ փուլի ընթացքում հնարավորություն ունեցանք զրուցել ծրագրի մենթոր Սան Ֆրանցիսկոյից AgriTech-ի ավագ պրոդուկտ մենեջեր Լևոն Մինասյանի հետ և քննարկեցինք, թե ինչ է AgriTech-ը ու ինչ է նշանակում մասնակցել այս ինկուբացիոն ծրագրին:
Ուրախ ենք կիսվել նաև, որ սպասվող AgriTech ինկուբացիոն ծրագրին Լևոնը ևս կներգրավվի որպես մենթոր:
Ո՞րն է Ձեր մասնագիտացումը
Վերջին 6 տարիներին մասնագիտացել եմ թվային գյուղատնտեսության մեջ:
Ի՞նչ է թվային գյուղատնտեսությունը
AgriTech-ում միշտ կան նոր սարքեր և տվյալների հոսքեր, ինչպիսիք են IoT սարքերը, կլիմայական տվյալների հեռավար աղբյուրները, բույսերի առողջության տվյալները, սևահողին վերաբերող տվյալներն ու տարբեր յուրահատկությունները, որոնք կարևոր են հետևելու, ֆերմերային ենթատեքստի և այս ողջ տվյալները ինչ-որ հարթակ տեղափոխելու համար: Ըստ էության, թվային գյուղատնտեսությունը ֆերմերների և գյուղատնտեսությամբ զբաղվող մարդկանց համար տվյալները գործարկելի դարձնելու ընթացքն է:
Կմանրամասնե՞ք, թե ինչից եք զրուցել ուսանողների հետ և թե ինչպես եք նրանց ուղղորդել։
Մենք անցել ենք պրոդուկտ մենեջեմենթի հիմունքների վրայով՝ ինչպես գնահատել տարբեր արժեքային առաջարկներ և անդրադառնալ տարբեր խնդիրների։ Սկզբի համար նրանց տվել ենք ընդհանրական խորհուրդներ տարբեր պրոդուկտների ու ֆունկցիաների մասին նրանց գաղափարների շուրջ և թե ինչպես կարելի է խնդիրներին լուծումներ տալ։ Շատ ժամանակ ենք ծախսել նվազագույն կենսունակ արտադրանքի վրայով անցելու համար, թե ինչպես կարող ենք ունենալ սկզբնական նախատիպ, այն տանել օգտատերերի հատուկ բազա և հետո կարծիքների հիման վրա այն ավելի լավը դարձնել ու ավելի երկարատև լուծում տալ։
Ի՞նչ եք կարծում` ինչպես են մասնակիցները մտածում։ Ի՞նչ հետաքրքիր դեպքեր եք հանդիպել ծրագրի օրերի ընթացքում։
Կարող եմ ասել, որ հանդիպածս ուսանողները մեծ երևակայություն ունեն, որը պետք է նոր գաղափարներ ու լուծումներ ստեղծելու համար այն ոլորտներում, որոնց մեջ շատ փորձառություն չունեն։ Այսպես՝ երևակայությունը գործի դնելու արդյունքում, նրանք իրենց պատկերացնում են ֆերմերների տեղում։ AgriTech-ի արժեքային շղթայում շատ խաղացողներ կան, այսպիսով նրբություններին ծանոթ լինելը շատ կարևոր է: Բայց ընդհանուր առմամբ նրանք շատ ուժեղ տեխնոլոգիական հմտություններ ունեն: Եվ այդ տեխնոլոգիական հմտությունները պրակտիկ կարիքների հետ համադրելով նրանք խնդիրներին լուծումներ են գտնում և հենց սրանով եմ փորձում օգնել նրանց:
Ինչու՞ AgriTech: Ինչու՞ պետք է զբաղվել դրանով:
AgriTech-ը իրականում մնացած բոլոր ոլորտների հիմքն է… չէ որ բոլորս պետք է սնվենք: Հող մշակելը, հացահատիկ աճեցնելը և հաստատուն սննդային համակարգ ունենալը մարդկության գոյության գրավականն է։ Անչափ գոհացնող և հետաքրքիր է այս ոլորտում խորանալը և սննդի ստեղծման գործընթացը ուսումնասիրելը: Եվ մենք այնպիսի ժամանակներում ենք ապրում, երբ կան ճնշող կարիքներ գյուղատնտեսության մեջ` օրինակ ջրի, էներգիայի և նույնիսկ հողի ռեսուրսների սահմանափակում: Իսկ տեխնոլոգիաները շատ մեծ դեր ունեն այդ բացը փակելու և իրավիճակը բարելավելու գործում: Հրաշալի ժամանակներ են AgriTech-ով զբաղվելու համար:
Ի՞նչ խորհուրդ կտայիք այն մարդկանց, ովքեր պատրաստվում են դիմել հաջորդ AgriTech ծրագրին: Ի՞նչ հմտություններ պետք է ունենան այս ծրագրի համար: Եվ ովքե՞ր կարող են իրենց ներդրումն ունենալ:
Հնարավոր է` շատերը մտածեն, որ պետք է ֆերմերության կամ էկոլոգիայի մեջ փորձառություն ունենալ կամ տեխնոլոգիական հմտություններ, հակառակ դեպքում չեն կարողանա օգուտ բերել ոլորտում։ Սա ճիշտ չէ: AgriTech-ը և ոլորտի այն ընկերությունները, որոնց հետ առնչվել եմ 7 տարի շարունակ, ցույց են տվել, որ կարող ես հանդիպել ցանկացած փորձառություն ունեցող մարդկանց: Եվ կարծում եմ, որ ինչքան շատ մարդիկ լինեն տարբեր ոլորտներից, այդքան մեր ոլորտն ավելի կհարստանա, որովհետև կունենանք տարբեր տեսակետներ, որն էլ ավելի կմասնագիտացնի աշխատանքը:
